Почитувана публика, Читачкиот клуб при КСП „Јадро“ ја најави новата средба за утре – 14 Јуни, 2023 г., со почеток во 19:00 ч. Сите заинтересирани може да отидат и да го посетат Клубот, да слушнат некои нови предизвици на полето на психологијата, односно критичката психологија и да ги збогатат своите согледувања кон хуманистиката како наука и како практика. Во прилог е поставен повикот за средбата:
„Нова средба на читачкиот клуб за критичка психологија во Центар-Јадро!
Утре (среда), со почеток во 19:00 часот ќе се одржи нова средба на Читачкиот клуб за Критичка психологија при КСП „Центар-Јадро“ на која што ќе се дискутираaт есеи од книгата „Прирачник за критичка психологија“ чиј уредник е Иан Паркер.
Секој кој е заинтересиран за психологијата, критичката психологија, психотерапијата, психијатријата е добредојден да учествува на некаков начин на средбата, а слободно може и да ја проследи.
Во време кога особено се потенцира да се внимава на менталното здравје е од претерана важност да се расправа за дисциплините што нудат третман за подобрување на душевната состојба на човекот.
Ова се есеите кои ќе се дискутираат утре:
– Емоција: поместување oтаде мејнстримот од Пол Стенер;
– Биолошки и еволутивни психологии: лимитот на критичката психологија од Џон Кромби;
– Личност: технологија, комодификација и патологија од Кина Милс;
– Теорија на активност: теорија и практика од Манолис Дафермос.
За Иан Паркер
Паркер е еден од најважните современи критичари на конвенционалната психологија. Автор е на 25 книги, кои му носат огромна репутација во областа на критичката психологија, марксистичката психологија и психоаналитичката теорија. Тој е соработник на Bританското психолошко здружение, почесен професор на Универзитетот во Лестер и уредник на Annual Review of Critical Psychology. Паркер, исто така, е практикант психоаналитичар и член на Центарот за Фројдовска Анализа и Истражување и на Лондонското здружение на Новата Лаканска школа.
Тема за оваа сезона: Критичка психологија.
Критичката психологија, во суштина е дисциплина што се занимава со преиспитување на позициите на академската и практичката психологија, но претставува плуралност на идеи, учења, ставови и нови практики за поопширно разгледување на нечии психолошки предизвици и проблеми. Критичката психологија е насочена кон тоа што традиционално се поима како социјална психологија и го анализира контекстот во којшто човекот кој се судрува со одредени проблеми се наоѓа. Критичката психологија не е само научна дисциплина, изземена од општествените текови, туку таа е и политичка алатка за надминување на системските недостатоци во поглед на создавањето на луѓе кои ќе бидат третирани како луѓе со лични психолошки проблеми.
Самото основање на психологијата како наука е проткаено со низа предизвици, од една страна како дисциплина се наоѓа на крстопатот во поглед на самиот зачеток на хуманистиката и општествените науки, а од друга страна се обидува да се воспостави како сигурна, односно егзактна наука врз основа на позитивизмот ново-воспоставената епистемологија.“
