Невена Алексовски прв пат ќе изложува пред македонската публика во склоп на десеттото издание на фестивалот „Прво па женско“. Невена Алексовска има бројни групни и самостојни изложби и многу активна уметница од независната словенечка културна сцена. Во галеријата на „PrivatePrint“ ќе се претстави со изложбата „Земјата во нашите џебови“, курирана од Јана Старделова, продуцирана од „Тииит! Инк.“ и истовремено ќе биде промовирана и нејзината книга „Меланхолија на напуштените краишта“, издадена од „PrivatePrint“. Подолу, мал дел од промотивниот материјал на галеријата.
„Изложбата, како и книгата, се всушност комуникација со претците, со кои врската била прекината заради нивните преселби или заради предвремена смрт (каква што била смртта на нејзините баби и дедовци). На изложбата, користејќи материјали како земја, камења, парчиња цемент, стари облеки и друг текстил, таа го проучува односот со почвата, територијата, просторот, како и со ограничувањето, присвојувањето и исклучувањето. Преку уметничката, визуелна артикулација на личното преселничко искуство, односот со претците и со семејната историја, таа се обидува да упати на универзалното во овие искуства, особено во смисла на едно интимно, чувствено и ирационално искусување на споменатите состојби и околности.“
Промоцијата на книгата и разговор со авторката ќе има во „PrivatePrint“ на 13.10.2022 во 19:00 часот. Изложбата ќе биде отворена час подоцна, во 20:00 часот. Изложбата ќе може да се посети до 12 Ноември, од среда до сабота од 12 до 18 часот.
Овој е линкот за фб настанот за ова збиднување, а подолу е постерот од изложбата на Невена Алексовски.
